Netflix-ийн “Squid Game 2” кинонд гардаг Солонгосын уламжлалт хүүхдийн тоглоом болох Гонги нь дэлхий даяар шуугиан тарьж хамгийн эрэлттэй тоглоомын нэг болоод байна. Энэхүү цувралд Солонгосын уламжлалт таван тоглоомыг танилцуулсан бөгөөд эдгээр тоглоомоос таван жижиг чулуугаар тоглодог Гонги тоглоом олон улсын үзэгчдийн анхаарлыг татаад байна. Арванхоёрдугаар сарын 31-ний байдлаар Гонги тоглоом тоглож буй бичлэг Tik Ток сүлжээнд хамгийн өндөр хандалттай байгаа бөгөөд youtube платформ дээр “Гонгиг хэрхэн тоглох вэ ?” нэртэй зааварчилгааны видео “Squid game 2” цувралын дараа үзэгчдийн сэтгэгдэлд булуулсан байна.
Үзэгчдийг татаж буй Гонги тоглоом нь таван үе шаттай бөгөөд чулууг агаарт шидэж унахаас нь өмнө бусдыг нь барьж авах юм. Цахим худалдааны Amazon.com сайт дээр гонги тоглоомын багцын худалдаа огцом өссөн бөгөөд 8 доллароор худалдаалж байна.
Ташрамд дурдахад Гонги тоглоомтой ижил төстэй тоглоом азийн орнуудад олон байдаг байна. Филиппинд “Jackstone” Казахстанд “Веs tas” Малайзад “Бату Серембан” гэх тоглоомууд гонгитой төстэй дүрэмтэй байна. Монгол ардын уламжлалт наадгай шагай шүүрэх тоглоом ч мөн адил төстэй тоглоомын нэг юм.
Солонгосын Гонги тоглоомын нийгэмлэгийн мэдээлснээр дэлхийн 30 орчим оронд гонгитой төстэй уламжлалт тоглоом байдаг байна.