1990-ээд оны Солонгосын алдарт “Элсэн цаг” олон ангит кино 2025 оны эхний өдөр Netflix- ээр цацагдаж дэлхийн өнцөг булан бүрд үзэгчдэд хүрсэн билээ. “Элсэн цаг” цуврал “Squid Game 2” ын гол дүрийн жүжигчин И Жун Жэгийн хамгийн алдартай бүтээлүүдийн нэг учраас үзэгчид сонирхон үзэж байна.

Уг бүтээл нь 1995 онд цацагдахдаа дунджаар 46%-ийн үзэгчдийн үнэлгээ авч, төгсгөлийн анги нь 64.5%-д хүрсэн байна. Энэ бол Солонгосын түүхэн дэх хамгийн өндөр үзэлттэй киноны 4-р байр юм. “Элсэн цаг” драма үзэгчдийг байлдан дагуулж байсан бөгөөд тухайн үед киногоо үзэх гэж ажилтнууд оффисоо эрт орхиж, гудамж хоосорч ресторан, баар ердийнхөөс эрт хаагдах зэргээр үндэсний хэмжээний үзэгдэл болж байжээ. Киноны найруулагчаар Ким Чен Хак ажиллаж, зохиолыг Сон Жи На бичсэн “Элсэн цаг” драма нь 1970-аад оны сүүлээс 1990-ээд оны эхэн үе хүртэл, тэр дундаа 5-р сарын 18-ны Гванжүгийн бослого, Өмнөд Солонгосын үймээн самуунтай үеийн түүхийг харуулдаг юм.

Тухайн үеийн шинэ залуу жүжигчин И Жун Жэ Хэ Риний үнэнч бие хамгаалагч Бэк Жэ Хигийн дүрээр үзэгчдийг байлдан дагуулж, кэндогийн гайхалтай ур чадвар, шантаршгүй үнэнч байдлаа харуулдаг билээ.