Blackpink хамтлагийн дуучин, жүжигчин Жисү 2021 онд “Snowdrop” нэртэй олон ангит кинонд гол дүр бүтээж, кино урлагт чамгүй жүжигчин гэдгээ харуулсан билээ. Тэгвэл түүний тоглосон “Newtopia” гэх шинэхэн цуврал тун удахгүй үзэгчдийн хүртээл болох гэж байна.

Жисү дэлхий сүйрч байхад ч найз залуугийнхаа зүг зоригтойгоор гүйдэг Юн Жү гэх эмэгтэйн дүрийг бүтээсэн бөгөөд дүрээ бүтээхийн тулд action сургуульд суралцжээ. Тэрээр бие бялдрын хүчээ сургах нь хүнд хэцүү зураг авалтын хуваарийг тэсвэрлэхэд тусалсан хэмээв.

Харин түүний дүрийн талаар найруулагч “Надад хошин шог, гүн гүнзгий байдлыг хоёуланг нь шингээж чадах жүжигчин хэрэгтэй байсан. Ийм дүрслэлд тохирсон хүнийг бодоход тэр даруй Жисү санаанд орсон” гэжээ.

Юн Сонг Хёны найруулсан найман ангит уг цувралд зомбигоор дүүрсэн ертөнцийн сүйрлийн эмх замбараагүй байдлыг цэрэг Жэ Юн (Парк) болон түүний найз охин Юн Жү (Жи Сү) нарын хайр дурлалтай хамт өгүүлэх аж. Кино зохиолыг “Паразит” (2019) киноны зохиолч Хан Жин Вон, “Алуурчдын дэлгүүр” (2024) киноны зохиолч Жи Хо Жин нар хамтран бичжээ. “Newtopia” цуврал 2-дугаар сарын 7-ны 20:00 цагаас Coupang Play-д нээлтээ хийнэ.