One Direction хамтлагийн гишүүн агсан, дуучин Лиам Пэйний үхлийн шалтгааныг түүний төрөлх Их Британи улсад албан ёсоор “политравма” буюу олон төрлийн гэмтлээс үүдэн нас барсан гэж тогтоосон байна.

Хүний бие организм олон гэмтэл авахыг анагаахын нэр томьёогоор “политравма” гэж  нэрлэдэг ажээ.

Лиам Пэйний үхлийн шалтгааныг тогтоож, батлах эцсийн сонсгол өнгөрөгч сарын 17-ны өдөр Букингэмшайрын шүүх эмнэлгийн байранд явагдаж, доктор Роберто Виктор Коэн дуучны үхлийн шалтгааныг “политравма” хэмээн батласан байна.

Дуучин Лиам Пэйн өнгөрсөн оны 10-р сарын 16-нд Аргентины нийслэл Буэнос Айрес хотын нэгэн зочид буудлын 3 давхрын тагтнаас унаж амиа алдсан юм. Түүний үхэлтэй холбогдуулан Аргентин улсад 5 хүнийг баривчлан, шүүхээр болоод байгаа. Тодруулбал тухайн зочид буудлын менежер Гилда Мартин, хүлээн авах ажилтан Эстебан Грасси, туслах ажилтнууд болох Эзекиел Перейра, Брайан Пайз болон дуучны найз Рожер Норес нарыг түүний тагтнаас унаж амиа алдахад хүргэсэн хэмээн буруутгаад байгаа юм.

Өнгөрсөн 11-р сард Аргентин улсын прокурорын албанаас Лиам Пэйний биед токсикологийн шинжилгээ хийхэд согтууруулах ундаа, кокаин, антидепрессант эм бэлдмэлийн ул мөр илэрснийг мэдэгдэж, мөн түүний үхлийн шалтгааныг өндрөөс унахдаа олон төрлийн гэмтэл авч, тархины дотоод болон гадна цус алдалтаас болж нас барсан гэж үзсэн билээ. Түүнчлэн Л.Пэйнийг хагас болон бүрэн ухаан мэдрэлгүй байх үедээ тагтнаас унасан гэсэн хувилбарыг хамгийн өндөр магадлалтай хэмээн санал болгосон юм.

31 насандаа хорвоогийн мөнх бусыг үзүүлсэн дуучны оршуулгын ёслол өнгөрсөн 11-р сард Букингэмшайр мужийн Амершам хотод болсон бөгөөд One Direction хамтлагийнх нь гишүүд болох дуучин Харри Стайлс, Луис Томлинсон, Наял Хоран, Заин Малик нар, найз бүсгүй Кэйт Кэссиди болон хуучин хамтран амьдрагч, дуучин Шерил нар ирж оролцон, түүнийг эцсийн замд нь үдсэн билээ.