Энэ долоо хоногийн мягмар гарагаас эхлэн асч, хэдхэн өдрийн дотор 117 мянган шоо дөрвөлжин км талбайг хамран газар аваад байгаа Лос Анжелесийн ой хээрийн түймрийн улмаас орон гэрээ алдаад байгаа оршин суугчдын дотор олны танил олон алдартнууд багтаж байгаа талаар барууны хэвлэлүүд онцлон мэдээлж байна.

“Америкт нэгэн удаа”, “Казино” зэрэг киноны дүрээрээ алдартай, Холливудын жүжигчин Жеймс Вудс хамгийн том талбайг хамран асч байгаа Палисэйдс дэх үл хөдлөх хөрөнгөө алдсан талаараа CNN сувагт нулимс дуслуулан ярьсан байна.

Голцуу инээдмийн кинонд тоглодгоороо алдартай жүжигчин Билли Кристал мөн Палисэйдс дэх байшингаа галд алдсан тухайгаа мэдэгдэж, эхнэр Жэнисийнхээ хамт тэрхүү байшинд 1979 оноос хойш амьдарснаа дурсжээ.

“Хилтон” сүлжээ зочид буудлын өв залгамжлагч Пэрис Хилтоны Малибу дахь гэр галд шатаж, “гэрээ шатаж байгааг телевизийн шууд мэдээгээр үзээд суух мэдрэмж хүнд байсан” хэмээн өөрийн Инстаграм хуудсандаа бичсэн байна.

Холливудын гэр бүлийн хосууд болох Адам Броди, Лейтон Мийстер нар, Спенсер Пратт, Хайди Монтаг нар ой хээрийн түймэрт байшингаа алдсан талаараа ярьжээ.

Энэ мэтчилэн дуучин, жүжигчин Мэнди Мур, телевизийн хөтлөгч Рикки Лэйк, Холливудын алдарт жүжигчин Сэр Энтони Хопкинс, Марк Хамилль, Юджин Леви, Жон Гудман, Стив Гуттенберг, Кэри Элвес, Майлс Теллер, Анна Фарис, Камерон Мэтисон, дуу зохиогч, хөгжмийн зохиолч Диана Уоррен зэрэг олон алдартнууд түймэрт орон гэр, байшин барилга, үл хөдлөх хөрөнгөө алджээ.

Түүнчлэн ой хээрийн түймрийн улмаас энэ оны Оскарын шагналд нэр дэвшигчдийг зарлан танилцуулах хуваарьт арга хэмжээг хоёр өдрөөр хойшлуулж, Screen Actors Guild Awards шагналд нэр дэвшигчдийг танилцуулах арга хэмжээг цуцлаж, “Unstoppable”, “Better Man”, “Wolfman” зэрэг шинэ киноны нээлтийн арга хэмжээнүүд цуцлагдаад байна.