Холимог тулааны UFC холбооны зодог тайлсан аварга Хабиб Нурмагомедовыг АНУ-ын Frontier Airlines компанийн ажилтнууд онгоцноос хүчээр буулгасан хэрэг явдал болжээ.
Оросын холимог тулааны аварга Хабиб Нурмагомедовын хэлснээр тэрээр АНУ-ын Лас Вегас хотын Харри Рейдийн олон улсын нисэх онгоцны буудалд Frontier Airlines компанийн ажилтнуудтай суудлын хэрүүл маргаан хийсний улмаас түүнийг нисэх онгоцноос буулгасан байна.
Тэрээр даваа гарагт өөрийн Х хуудсанд энэ тухай нийтэлж, өөрийгөө арьс өнгөөр ялгаварлан гадуурхах явдлын хохирогч болсон эсэх талаар олон нийтээс асуугаад байна.
Хабиб болон онгоцны ажилтнуудын хоорондох хэрүүл маргааны бичлэгүүд цахим орчинд тараад байгаа бөгөөд зарим эх сурвалжууд энэхүү үйл явдлыг Alaskan Airlines-ийн онгоцонд болсон гэж мэдээлжээ. Энэхүү үйл явдал хэзээ болсон нь тодорхойгүй байгаа ба Frontier Airlines компанийн зүгээс одоог хүртэл ямар нэгэн тайлбар мэдээлэл хийгээгүй байна.
Ямартай ч энэхүү маргаан онгоцны үйлчлэгч эмэгтэй онгоцны хаалганы хажуу талын суудалд сууж болохгүй гэсэн шаардлагыг Х.Нурмагомедовт тавьснаас болж гарсан бөгөөд түүнийг “заавал тэр суудлаас босгох үндэс юу байсан юм бол, миний арьсны өнгө, гарал үүсэл, яс угсаа юу, би сайн мэдэхгүй байна” хэмээн UFC-гийн аварга асан бичсэн байна.
Түүнд шаардлага тавьсан онгоцны үйлчлэгч эмэгтэйн ахлах менежер Х.Нурмагомедовт өөр суудалд суух, эсвэл өөр нислэгээр нисэх шаардлагыг удаа дараа тавьж байгаа нь цахим орчинд тарсан бичлэгт харагдаж байгаа юм. Х.Нурмагомедовын хэлснээр онгоцны үйлчлэгч түүнтэй хоёрхон минут маргалдсаныхаа дараа хамгаалалтын албыг дуудаж, түүнийг онгоцноос хүчээр буулгасан бөгөөд цаг хагасын дараа өөр онгоцоор ниссэн гэжээ.
Х.Нурмагомедовыг энэ сарын 18-ны өдөр АНУ-ын Невада мужийн Лас Вегас хотноо зохиогдох хуваарьтай UFC 311 арга хэмжээнд оролцож байгаа багийн тулаанчдаа дэмжихээр Калифорни руу нисэх үед энэ үйл явдал болсон болов уу гэж хэвлэлүүд таамаглал дэвшүүлэн бичиж байна.
ОХУ-ын Дагестанаас гаралтай Х.Нурмагомедов нь холимог тулааны спортын домогт тамирчдын нэг бөгөөд тэрээр UFC холбоонд тулалдаж, нэг ч ялагдалгүй буюу 29-0 гэсэн үзүүлэлттэйгээр 2021 онд зодог тайлж байсан юм.