Дархан-Уул аймагт энэ сарын 25, 26-нд “Бурхантын өвлийн наадам 2025” өвлийн аялал жуулчлалыг хөгжүүлэх эвент болно. Үүний хүрээнд “Дархан цом” өвлийн мөсний загасчлалын аймгийн аварга шалгаруулах тэмцээнтэй. Уг хаалттай тэмцээнийг Дарханы загасчлалын спорт холбоо, “Түшиг-Уул” ХХК хамтран, Дархан сумын нутагт орших “Түшиг-Уул” ХХК-ийн хиймэл нууранд зохион байгуулна.

Үүний дараа мөсний загасчлалын “Дархан цом 2025” нээлттэй тэмцээнийг 2 дугаар сарын 1, 2-ны өдрүүдэд зохион байгуулахаар төлөвлөжээ. Тус аймгийн ЗДТГ, Соёл, урлаг, аялал жуулчлал, залуучуудын газар, Биеийн тамир, спортын газар, Байгаль орчны газар энэ тэмцээнийг 10 дахь жилдээ хамтран зохион байгуулж байна.