Лос Анжелесийн ой хээрийн түймэрт орон гэрээ алдсан алдартнуудын тоо нэмэгдсээр байна.

Холливудын од, “Crazy Heart” киногоороо Оскарын шагнал хүртсэн ахмад жүжигчин Жефф Бриджес эцэг эхээсээ өвлөн авсан Лос Анжелестай залгаа Малибу хот дах байшингаа түймэрт алдсан байна.

Оскарын шагналт жүжигчин Мэл Гибсоны мөн Малибу хот дах байшин юу ч үгүй шатсан бөгөөд тэрээр Жо Роганы подкастад оролцож байх үеэр байшин нь шатжээ.

Малибу хотод орон гэрээ алдсан хүмүүсийн тоонд мөн жүжигчин, телевизийн хөтлөгч Рози О’Доннел, дуучин Бейонсе-гийн ээж Тина Ноулес, дуу зохиогч Диана Уоррен зэрэг олон алдартнууд багтжээ.

Хоёр удаагийн Оскарын шагналт жүжигчин Сэр Энтони Хопкинс Палисэйдс тойрог дах хоёр байшингаа алдсан байна. Тэрээр Инстаграмдаа оруулсан нийтлэлдээ “гэрээсээ авч үлдсэн цорын ганц зүйл эхнэр бид хоёрын хайр” хэмээн бичжээ.

Холливудын жүжигчин Майло Вентимилья, R&B дуучин реппер Jhené Aiko нар ой хээрийн түймэрт байшингаа алдаад байна.

Түүнчлэн Английн дуучин Дуа Липа, Take That хамтлагийн гишүүн Марк Оуэн нар ой хээрийн түймрийн бүсээс өөр аюулгүй байршил руу нүүсэн талаараа өөрсдийн сошиал хуудсан дээрээ нийтэлсэн байна.